ବାରିପଦା,୨୧ା୮: ମୟୂରଭଞ୍ଜର ସମୃଦ୍ଧ କଳା, ସଂସ୍କୃତି ଓ ସ୍ଥାନୀୟ ମହିଳା କାରିଗରଙ୍କ ହାତତିଆରି ପରିବେଶ ଅନୁକୂଳ ରାଖୀ ଏବେ ସାରା ରାଜ୍ୟରେ ଚର୍ଚ୍ଚାର ବିଷୟ ପାଲଟିଛି। ବାରିପଦାସ୍ଥିତ ବୟନିକା ବିକ୍ରୟ ଷ୍ଟୋର ‘ମୟୂର ଶିଳ୍ପ’ ପରିସରରେ ଆନୁଷ୍ଠାନିକ ଭାବେ ‘ରାଖୀ ଷ୍ଟଲ୍–୨୦୨୬’ ଉଦ୍‌ଘାଟିତ ହୋଇଯାଇଛି। ଅତିରିକ୍ତ ଜିଲ୍ଲାପାଳ ଦୁଃଖବନ୍ଧୁ ନାୟକ ମୁଖ୍ୟ ଅତିଥି ଭାବେ ଯୋଗଦେଇ ଏହି ସ୍ୱତନ୍ତ୍ର ଷ୍ଟଲ୍‌କୁ ଉଦ୍‌ଘାଟନ କରିଛନ୍ତି। ସ୍ଥାନୀୟ କାରିଗର, ମହିଳା ସ୍ୱୟଂ ସହାୟକ ଗୋଷ୍ଠୀ ଏବଂ ଉତ୍ପାଦକ ଗୋଷ୍ଠୀଙ୍କ ଦ୍ୱାରା ନିର୍ମିତ ଏହି ରାଖୀଗୁଡ଼ିକୁ ବ୍ୟାପକ ବଜାର ସୁଯୋଗ ଯୋଗାଇଦେବା ସହ ମହିଳାମାନଙ୍କ ଆର୍ଥିକ ଆତ୍ମନିର୍ଭରତା ବୃଦ୍ଧି କରିବା ଏହି ପଦକ୍ଷେପର ମୁଖ୍ୟ ଉଦ୍ଦେଶ୍ୟ। ଉଦ୍‌ଘାଟନ ଅବସରରେ ଅତିରିକ୍ତ ଜିଲ୍ଲାପାଳ କହିଛନ୍ତି ଯେ, ସ୍ଥାନୀୟ ସମ୍ବଳ ଓ ପାରମ୍ପରିକ ଦକ୍ଷତାକୁ ବଜାର ସହ ଯୋଡ଼ିବା ଦ୍ୱାରା ଗ୍ରାମୀଣ ଅର୍ଥନୀତି ଅଧିକ ସୁଦୃଢ଼ ହୋଇପାରିବ। ମୟୂରଭଞ୍ଜ ସବାଇ କୃଷକ ଉତ୍ପାଦନ କମ୍ପାନୀ ଲିମିଟେଡ୍‌ ଓ ସ୍ୱୟଂ ସହାୟକ ଗୋଷ୍ଠୀଙ୍କ ମିଳିତ ସହଯୋଗରେ ସବାଇ ଘାସ, ଡୋକ୍ରା ଏବଂ ବାଉଁଶ ଭଳି ପ୍ରାକୃତିକ ଉପାଦାନରେ ଏହି ଆକର୍ଷଣୀୟ ଇକୋ-ଫ୍ରେଣ୍ଡଲି ରାଖୀ ପ୍ରସ୍ତୁତ କରାଯାଇଛି। ଏହି ହସ୍ତନିର୍ମିତ ରାଖୀର ଚାହିଦା ଏବେ ଜିଲ୍ଲା ସୀମା ଟପି ସାରା ରାଜ୍ୟରେ ବୃଦ୍ଧି ପାଇଛି। ବାଲେଶ୍ୱର, ସମ୍ବଲପୁର, ଖୋର୍ଦ୍ଧା ଏବଂ ପୁରୀ ଜିଲ୍ଲାର ‘ଓରମାସ୍‌‘ ମଧ୍ୟ ବିକ୍ରି ପାଇଁ ମୟୂରଭଞ୍ଜ ଓରମାସ୍‌ ନିକଟରୁ ବହୁ ପରିମାଣରେ ରାଖୀ ସଂଗ୍ରହ କରିଛନ୍ତି, ଯାହାକି ମହିଳା କାରିଗରମାନଙ୍କ ପାଇଁ ଅତିରିକ୍ତ ରୋଜଗାରର ଏକ ବଡ଼ ମାଧ୍ୟମ ସାଜିଛି। ଏହି ଉଦ୍‌ଘାଟନୀ କାର୍ଯ୍ୟକ୍ରମରେ ଓରମାସ୍‌ର ଡେପୁଟି ନିର୍ବାହୀ ଅଧିକାରୀ ଭାଗ୍ୟଲକ୍ଷ୍ମୀ ରାଉତ, ଓଡ଼ିଶା ଜୀବିକା ମିଶନ୍‌ର ଜିଲ୍ଲା ପ୍ରକଳ୍ପ ପରିଚାଳକ ନବୀନ କୁମାର ସେନାପତି, ମିଶନ୍ ଶକ୍ତିର ଜିଲ୍ଲା ପ୍ରକଳ୍ପ ସଂଯୋଜକ ନିରଞ୍ଜନ ପଣ୍ଡା, ଜିଲ୍ଲା ଶିଶୁ ସୁରକ୍ଷା ଅଧିକାରିଣୀ ମମତାମୟୀ ବିଶ୍ୱାଳ ଏବଂ ପିଏମ୍ ଲିଭଲିହୁଡ୍‌ର ମଧୁସ୍ମିତା ଭୂୟାଁଙ୍କ ସମେତ ବିଭିନ୍ନ ବିଭାଗର ଅଧିକାରୀ ଓ କର୍ମଚାରୀମାନେ ଉପସ୍ଥିତ ଥିଲେ।