ଅସ୍ତରଙ୍ଗ, (ପ୍ରସାର ଖୁଣ୍ଟିଆ):  ଶନିବାର ଅସ୍ତରଙ୍ଗ ପଞ୍ଚାୟତ ସମିତିର ଷଷ୍ଠ ତମ ବୈଠକ ଅଧ୍ୟକ୍ଷା ଆରତୀ ନାୟକଙ୍କ ସଭାପତିତ୍ୱରେ ଅନୁଷ୍ଠିତ ହୋଇଯାଇଛି।ଏହି ବୈଠକରେ କାକଟପୁର ବିଧାୟକ ତୁଷାର କନ୍ତି ବେହେରା, ଜଗତସିଂହପୁର ସାଂସଦଙ୍କ ଅସ୍ତରଙ୍ଗ ବ୍ଲକ ପ୍ରତିନିଧି ଦିବାକର ଛାଟୋଇ, ବ୍ଲକ ଉପାଧକ୍ଷ ଦୁର୍ଜ୍ଜୟ ମିଶ୍ର,୧ ନମ୍ବର ଜୋନ ଜିଲ୍ଲା ପରିଷଦ ସଭ୍ୟା ସରସ୍ବତୀ ସ୍ୱାଇଁ, ବିଡ଼ିଓ ସସ୍ମିତା ବେହେରା, ଅତିରିକ୍ତ ତହସିଲଦାର ପ୍ରଭୁ ପ୍ରସାଦ ପଣ୍ଡା ଯୋଗଦେଇ ଆଲୋଚନାରେ ଅଂଶ ଗ୍ରହଣ କରିଥିଲେ। ବୈଠକରେ ଅସ୍ତରଙ୍ଗ ବ୍ଲକର ୧୫ ଗୋଟି ପଞ୍ଚାୟତର ସମସ୍ତ ସରପଞ୍ଚ ସମିତିସଭ୍ୟଙ୍କ ସହ ଅସ୍ତରଙ୍ଗ ପଞ୍ଚାୟତ ସମିତି ଅନ୍ତର୍ଗତ ବିଭିନ୍ନ ବିଭାଗର ଅଧିକାରୀ ଓ କର୍ମକର୍ତ୍ତାମାନେ ଉପସ୍ଥିତରେ ପଞ୍ଚାୟତ ସମିତି ଦ୍ୱାରା ଅସ୍ତରଙ୍ଗ ବ୍ଲକର ବିଭିନ୍ନ ପଞ୍ଚାୟତରେ ହୋଇଥିବା ଉନ୍ନୟନ ମୂଳକ କାର୍ଯ୍ୟକ୍ରମ ଉପରେ ଆଲୋଚନା କରାଯାଇଥିଲା। ଶିକ୍ଷା, ପରିମଳ, ସୌନ୍ଦର୍ଯ୍ୟକରଣ, ପାନୀୟ ଜଳ, ସ୍ୱାସ୍ଥ୍ୟ, ଭତ୍ତା, ଆବାସ ଯୋଜନା ଓ ଗମନାଗମନ ଭଳି ବିଭିନ୍ନ ଉନ୍ନୟନ ମୂଳକ କାର୍ଯ୍ୟକ୍ରମରେ ଏହି ପଞ୍ଚାୟତର ବିକାଶ ଓ ଆର୍ଥିକ ବଜେଟ ଉପରେ ଆଲୋଚନା କରାଯାଇଛି।ରାସ୍ତା ମରାମତି ବେଳେ ବିଭିନ୍ନ ସ୍ଥାନରେ ଖୋଳିଦେବାରୁ ଖାଲଖମା ସୃଷ୍ଟିହେବାରୁ ଦୁର୍ଘଟଣା ଘଟିବା, ଜଳଯୋଗାଣ ପାଇପ୍ ଫାଟି ପାନୀୟ ଜଳ ଯୋଗାଣରେ ପ୍ରତିବନ୍ଧକ ସୃଷ୍ଟିହେବା ସଂପର୍କରେ ବୈଠକରେ ଅଭିଯୋଗ ହେବାରେ ସେ ସବୁ ସୁଧାରିବାକୁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି। ତାଳଦା ପଞ୍ଚାୟତକୁ ମେଗା ପାନୀୟ ଜଳ ଯୋଗାଣରେ ସଂଯୋଗ କରିବା ପ୍ରସ୍ତାବ ଯାଇଥିବା ବୈଠକରେ ସୂଚନା ଦିଆଯାଇଥିଲା। ରାସ୍ତାରେ ଗାଈଗୋରୁ ଦୁର୍ଘଟଣା ପରେ ବିଳମ୍ବରେ ପ୍ରାଣୀ ଧାନ ବିଭାଗର ଆମ୍ବୁଲାନ୍ସ ପହଞ୍ଚିଥିବା ନେଇ ନୂଆଗଡ଼ ସରପଞ୍ଚ ଜିତେନ୍ଦ୍ର ସ୍ଵାଇଁ ଅଭିଯୋଗ କରିଥିଲେ। ସେହିପରି ୨୫ ଲକ୍ଷ ଖର୍ଚ୍ଚ ହେଲେ ମଧ୍ୟ ପୂର୍ବତ୍ତନ କ୍ରୀଡା ମନ୍ତ୍ରୀ ତଥା ବର୍ତ୍ତମାନର କାକଟପୁର ବିଧାୟକ ତୁଷାର କାନ୍ତୀ ବେହେରାଙ୍କ ସମୟରେ ଆଳଙ୍ଗପୁର ସ୍ଥିତ ମିନି ଷ୍ଟାଡିୟମ କାର୍ଯ୍ୟ ପୂର୍ଣ୍ଣାଙ୍ଗ ହୋଇନପାରିବା ଘଟଣାକୁ ସରପଞ୍ଚ ଶ୍ରୀ ସ୍ୱାଇଁ ବୈଠକରେ ଉଠାଇଥିଲେ। ବିଭିନ୍ନ ଅଭିଯୋଗ ଓ ଗ୍ରାମ ସଭାର ତାଲିକା ମୁତାବକ ଆଜିର ବୈଠକରେ କେତେକ ପ୍ରକଳ୍ପକୁ ଅନୁମୋଦନ ମିଳିଥିଲା। ନିୟୋଜିତ କୃଷକ ସାଥୀ ସଠିକ୍ କାର୍ଯ୍ୟ କରୁନଥିବା ପଞ୍ଚାୟତ ସମିତି ଉପାଧ୍ୟକ୍ଷ ଦୁର୍ଯ୍ୟୋୟ ମିଶ୍ର ପ୍ରଶ୍ନ ଉଠାଇ  ଏହାକୁ କୃଷି ଓ ଉଦ୍ୟାନ କୃଷି ବିଭାଗ ଗୁରୁତ୍ୱ ଦେବାକୁ ଦାବି କରିଥିଲେ ।ମୃତ ବ୍ୟକ୍ତିଙ୍କ ନାଁରେ ଭତ୍ତା ଟଙ୍କା ଯାଉଥିବା ଅଭିଯୋଗ ହେବାରୁ ଗାଁ ଗଣ୍ଡାରେ ଥିବା ଅଙ୍ଗନବାଡ଼ି ଜରିଆରେ ପଞ୍ଚାୟତ ସ୍ତରରେ ରିପୋର୍ଟ ନେଇ ସାମାଜଜିକ ସୁରକ୍ଷା ବିଭାଗ ଏଥିପ୍ରତି ସଚେତନ ହେବାକୁ ବୈଠକରେ ପରାମର୍ଶ ଦିଆଯାଇଛି। ଶିକ୍ଷକଙ୍କ ବଦଳି,ପଶୁ ଓ ମତ୍ସ୍ୟ ସମ୍ପଦ ବିଭାଗରେ ବିଭିନ୍ନ ଯୋଜନାରେ ସ୍ୱଚ୍ଛତା ଆଣିବାକୁ ପରାମର୍ଶ ଦିଆ ଯାଇଛି ।ବୈଠକରେ ଉପସ୍ଥିତ କାକଟପୁର ବିଧାୟକ ଶ୍ରୀ ବେହେରାଙ୍କୁ ସାଂସଦଙ୍କ ପ୍ରତିନିଧି ଶ୍ରୀ ଛାଟୋଇ ବିଭିନ୍ନ ଘଟଣାକୁ ନେଇ ପ୍ରଶ୍ନ ବାଣରେ ଘାଇଲା କରିଥିଲେ। ଶାନ୍ତିଶୃଙ୍ଖଳାର ସହ ସମିତି ବୈଠକ ଶେଷ ହୋଇଥିଲା ବେଳେ ବିଭିନ୍ନ ପଞ୍ଚାୟତର ସରପଞ୍ଚ ସମିତି ସଭ୍ୟ ସେମାନଙ୍କର ଦାବି ଓ ଅଭିଯୋଗ ଉପସ୍ଥାପନ କରି ସମସ୍ୟାର ସମାଧାନ କରିବାକୁ ନିଷ୍ପତ୍ତି ଗ୍ରହଣ କରାଯାଇଥିଲା।