ବାରିପଦା : ବିବାହର ପ୍ରତିଶ୍ରୁତି ଦେଇ ଶାରୀରିକ ସମ୍ପର୍କ, ଲକ୍ଷାଧିକ ଟଙ୍କା ଓ ସୁନା-ରୂପା ନେବା, ବିବାହ ପରେ ପରିତ୍ୟାଗ ଏବଂ ଧମକ ଦେବା ଭଳି ଗୁରୁତର ଅଭିଯୋଗକୁ ନେଇ ବାରିପଦା ଟାଉନ୍ ଥାନାରେ କାର୍ଯ୍ୟରତ ଏସ୍‌ଆଇ ପ୍ରଭାତ କୁମାର ନାୟକଙ୍କ ବିରୋଧରେ ମାମଲା ରୁଜୁ ହୋଇଛି। ପୁରୀ ଜିଲ୍ଲା ବ୍ରହ୍ମଗିରି ଅଞ୍ଚଳର ଜଣେ ଯୁବତୀଙ୍କ ଲିଖିତ ଅଭିଯୋଗ ଆଧାରରେ ପୋଲିସ ତଦନ୍ତ ଆରମ୍ଭ କରିଛି। ଅଭିଯୋଗ ଅନୁଯାୟୀ, ଗତ କିଛି ବର୍ଷ ଧରି ଯୁବତୀଙ୍କ ସହ ପ୍ରଭାତ କୁମାର ନାୟକଙ୍କ ସମ୍ପର୍କ ରହିଥିଲା। ପରବର୍ତ୍ତୀ ସମୟରେ ଉଭୟ ପରିବାରର ଉପସ୍ଥିତିରେ ମୟୂରଭଞ୍ଜ ଜିଲ୍ଲା କୁଳିଅଣାସ୍ଥିତ ଏକ ରାଧାକୃଷ୍ଣ ମନ୍ଦିରରେ ହିନ୍ଦୁ ରୀତିନୀତି ଅନୁସାରେ ବିବାହ ହୋଇଥିଲା। କିନ୍ତୁ ବିବାହ ପରେ ତାଙ୍କୁ ପରିତ୍ୟାଗ କରାଯାଇଥିବା ଏବଂ ଶାଶୂଘରେ ମଧ୍ୟ ତାଙ୍କୁ ନିର୍ଯାତନା ଦିଆଯାଇଥିବା ସେ ଅଭିଯୋଗ କରିଛନ୍ତି। ଏପରିକି ଏସ୍‌ଆଇଙ୍କ ସର୍ଭିସ୍ ବନ୍ଧୁକ ଦେଖାଇ ଟଙ୍କା ଆଣିବାକୁ ଧମକ ଦିଆଯାଇଥିବା ମଧ୍ୟ ଅଭିଯୋଗ ରହିଛି। ବିବାହର ପ୍ରତିଶ୍ରୁତି ଦେଇ ସେ ଯୁବତୀଙ୍କ ସହ ସମ୍ପର୍କ ରଖିବା ସହ ଟଙ୍କା ଓ ସୁନା-ରୂପା ଅଳଙ୍କାର ନେଇଥିବା ବାରିପଦା ଟାଉନ୍ ଥାନାରେ ଲିଖିତ ଅଭିଯୋଗ ହୋଇଛି। ପରେ ଅଧିକ ଟଙ୍କା ଓ ସୁନା ଦାବି କରି ଯୁବତୀଙ୍କୁ ଅଣଦେଖା କରାଯାଇଥିବା ମଧ୍ୟ ଅଭିଯୋଗରେ ଦର୍ଶାଯାଇଛି। ତେବେ ଏହି ସମସ୍ତ ଅଭିଯୋଗକୁ ଏସ୍‌ଆଇ ପ୍ରଭାତ କୁମାର ନାୟକ ଖଣ୍ଡନ କରିଛନ୍ତି। ତାଙ୍କ କହିବା ଅନୁଯାୟୀ, ଉଭୟଙ୍କ ମଧ୍ୟରେ ବିବାଦ ରହିଥିଲା ଏବଂ ଏହାର ସମାଧାନ ପାଇଁ ବାରମ୍ବାର ଆଲୋଚନା ହୋଇଥିଲା। ଆଲୋଚନା ବିଫଳ ହେବା ପରେ ପ୍ରତିଶୋଧପରାୟଣ ହୋଇ ମିଥ୍ୟା ମାମଲା କରାଯାଇଥିବା ସେ ଦାବି କରିଛନ୍ତି। ବିବାହ ସମ୍ପର୍କରେ ମଧ୍ୟ ସେ ନିଜ ପକ୍ଷ ରଖି କହିଛନ୍ତି ଯେ, ବିବାହ ପୂର୍ବରୁ ନିଜର ଆର୍ଥିକ ସ୍ଥିତି ଭଲ ନଥିବାରୁ ସେ ବିବାହ ପାଇଁ ପ୍ରସ୍ତୁତ ନଥିଲେ ଏବଂ ଏକରୁ ଦୁଇ ବର୍ଷ ସମୟ ମାଗିଥିଲେ। କିନ୍ତୁ ପରେ ଉଭୟଙ୍କ ସହମତିରେ ବିବାହ ହୋଇଥିବା ସେ କହିଛନ୍ତି। ପ୍ରଭାତଙ୍କ ଅଭିଯୋଗ ହେଉଛି, ବିବାହ ପରେ ଉଭୟଙ୍କ ମଧ୍ୟରେ ବାରମ୍ବାର ବିବାଦ ହେଉଥିଲା। ସେ ଆହୁରି ଦାବି କରିଛନ୍ତି ଯେ, ସ୍ତ୍ରୀଙ୍କ ପକ୍ଷରୁ ବାରମ୍ବାର ଆତ୍ମହତ୍ୟା କରିବାର ଧମକ ମିଳୁଥିବାରୁ ସେ ମାନସିକ ଚାପରେ ଥିଲେ ଏବଂ ଏଭଳି ପରିସ୍ଥିତିରେ ଏକାଠି ରହିବା ତାଙ୍କ ପାଇଁ ଅସୁରକ୍ଷିତ ମନେ ହୋଇଥିଲା। ଟଙ୍କା ନେବା ଅଭିଯୋଗ ସମ୍ପର୍କରେ ମଧ୍ୟ ସେ କହିଛନ୍ତି ଯେ, ଉଭୟଙ୍କ ମଧ୍ୟରେ ବନ୍ଧୁତା ସମୟରେ ଟଙ୍କା ଦେଣନେଣ ହୋଇଥିଲା, କିନ୍ତୁ ସମସ୍ତ ଟଙ୍କା ସାକ୍ଷୀଙ୍କ ଉପସ୍ଥିତିରେ ଫେରସ୍ତ କରିଦିଆଯାଇଛି। ଅନ୍ୟପକ୍ଷରେ, ମାମଲାରେ ଭାରତୀୟ ନ୍ୟାୟ ସଂହିତା ଧାରା ୬୯ ଲାଗୁ ହୋଇଥିବାକୁ ନେଇ ମଧ୍ୟ ପ୍ରଭାତ ପ୍ରଶ୍ନ ଉଠାଇଛନ୍ତି। ବିବାହ ସମ୍ପର୍କ ଥିବା ସତ୍ତ୍ୱେ ଏହି ଧାରା ଲାଗୁ କରାଯାଇଥିବାରୁ ସେ ମର୍ମାହତ ଓ ମାନସିକ ଚାପରେ ଥିବା କହିଛନ୍ତି। ଘଟଣା ସମ୍ପର୍କରେ ବାରିପଦା ସଦର ଏସ୍‌ଡିପିଓ କହିଛନ୍ତି ଯେ, ଯୁବତୀଙ୍କ ଲିଖିତ ଅଭିଯୋଗ ଆଧାରରେ ବାରିପଦା ଟାଉନ୍ ଥାନାରେ ମାମଲା ରୁଜୁ ହୋଇଛି ଏବଂ ଘଟଣାର ତଦନ୍ତ ଜାରି ରହିଛି। ତେବେ ଅଭିଯୋଗ ସତ କି ମିଥ୍ୟା,ତଦନ୍ତ ପରେ ହିଁ ସ୍ପଷ୍ଟ ହେବ। ଉଭୟ ପକ୍ଷର ଦାବି ଓ ପ୍ରତିବାଦି ମଧ୍ୟରେ ଏବେ ତଦନ୍ତର ଫଳାଫଳ ଉପରେ ନଜର।